Wednesday 25 September 2013

සොඳුරු මතකයන් නුඹ ගැන.......

වැව් ඉවුර දිගේ නුඹ
ඇවිදන් යන අන්දම
දුර තියාන බලන් ඉන්න
බව දන්නව නුඹ යලි හොරැහින් බැලුවට

සුදු පිරුවට ඇඳගෙන
පෝ දාට පන්සලට
නුඹ යන හැටි මට මතක්වෙනව
තෙල්මල් අරගෙන ලැසි ගමන් ලතාවට

නුඹ නීල නයන ලඟ
හිත හීන මවාගෙන
බොරු තරහක් ගෙන මවාපාන
ආදර බැල්මට මම ආලෙන් බැඳුනට

මතු දවසක මම නුඹ
කාරකාර බඳින්නට
හත්දවසක් මඟුල් කන්න
ගමට ඇසෙන්නට නුඹ කැන්දන් යන්නට

Thursday 12 September 2013

අප්පච්චී



උදේ ඉඳලම...
මහන්සි වෙලා...
වැඩකරල...
දවසටම...
වතාවක් දෙවතාවක් දකින..
හීන ගොන්නක් පොදි බැඳන්...
දුර හිතල වැඩකරන...
ඒත්,
හැමදාමත්...
වෙහෙස අමතක කරලා...
මාව තුරුළු කරන් හුරතල් කරපු..
ජීවිතේ ගැන කියල දුන්න...
අප්පච්චී...
කවදා හරි දවසක...
මුළු ලෝකෙම දිනල...
මම ආයෙත් එනවා...
තුරුලු වෙලා...
හුරතල් වෙන්න..
මගේම අප්පච්චි එක්ක...

හැඟුම් පිරි හදකින්.....

රඟදෙන නුඹෙ කෙහෙරැලි
ලැබදෙන නුඹෙ මදහසේ
හිනැහෙන නුඹෙ ඇස් දෙකේ
මියැදෙමි මම මියුලැසී

මුමුනන පෙම්බර වදන්
ගිලිහෙන විට තද කරන්
උන්නට නුඹ හිර කරන්
සත්තයි නුඹ පෙම් බැඳන්

අවසර නැති හින්දම
දුර ඉන්නෙමි හිඳගෙන
දවසක ලඟ ඉන්නට
ගන්නෙමි කරකාරෙට

යන්නට නුඹ හැරුනට
මම කීදේ අහගෙන
පියවර දෙක තුනකට
පසු හැරෙනවා මාවෙත

හිරකල නුඹෙ පෙම්බර
හද සිතුවිලි පාකර
එනවා යලි මතුකර
කඳුලැලි නුඹෙ ඇස්වල

ලස්සන පොඩි ලෝකෙක
අපි තනිවීලා ඇත
හැඟෙනව නුඹ මාවෙත
එනු ඇත යලි දිවගෙන

අමතක කර ලොව දන
ඉන්නා ලොව නෙක තැන
නුඹ එනවා තුරුලට
මා සිප වැලඳාගෙන


@ සිහින දකිමින්..... :P

Wednesday 11 September 2013

නුඹ දැක.....

බුකියේ කෙලවරක ඉඳගෙන රෑට නොකා
පුටුවේ යටින් විදිනා මදුරුවන් මරා
සිතඟේ ඇඳුනු රූ දහරා මතක් වෙලා
ලියැවෙන කවිය කියවා නුඹ ලයික් කලා

පිටුවට ලියන කවි පද නෙක ගලපමින
වරදින තැන් ඇත කවි නීතිය ලියන
හිතනා නිසා අදහස බෙදලා දෙන්න
ලියනව කවිය බුකියේ පිටුවේ මෙන්න

රන්වන් පාට දිලෙනා කෙස් වැටිය දැක
නිල්වන් නුවන් ගස්සා හැරෙනවා දැක
පිරිපුන් ලමැද රියසක වැනි උකුල දැක
වල්මත් වෙලා වාගෙයි නුඹෙ ගමන දැක

කන්නයි බොන්න කරනා දේ මතක නැතී
යන්නයි එන්න නුඹ සිටිනා තැන කැමතී
ඉන්නයි වෙන්න නුඹගේ තුරුලටම එතී
සත්තයි මෙන්න නුඹ ගැන ආදරය සිතී

Tuesday 10 September 2013

අවසරද මට?

මගෙ සිතේ නුඹ නමට
ලියැවෙච්චි පෙම් කවිය
ලියන්නට අවසරද
සඳේ නුඹෙ හද ලඟම

නුඹේ නෙතු පවසද්දි
මගේ ලඟ නුඹ ඉද්දි
හිතේ මම රජ වෙද්දි
ආදරේ පිරවෙද්දි

අමතකව නොයන්නට
නුඹෙ ලඟම හිඳින්නට
අවසරද රජ වෙන්න
අග රැජින නුඹ වෙන්න

Thursday 5 September 2013

පද නැවතුන තැන

ආදරේ ගැන ලියපු කවි වල තාම ඇත මම තනිවෙලා
ජීවිතේ ගැන ලියන කවියට තාම පද නැහැ ගැලපිලා
මායිමේ ඉඳ බලන නුඹ ගැන ලියන්නට මට සිත්වෙලා
ඒත් එය බෑ තාම තනියෙන් හිඳිමි පද දෙක නැවතිලා